Онгоцоор нисэхдээ юунд анхаарах вэ? Анх удаа онгоцонд суух гэж байвал бүгдийг нь унш!!
Анх удаа онгоцонд суух гэж байвал бүгдийг нь унш!!
Өнөөдөр та бүхэндээ гадаад болон дотоодын нислэг хийхдээ анхаарах зүйлсийн талаар өөрийн мэддэг туршлагаа маш дэлгэрэнгүй хуваалцах болно. Хэрэв та их мэдээлэл дунд хаанаас юуг олж уншихаа сайн мэдэхгүй бол бид доод хэсэгт дэд гарчигуудыг оруулж өгсөн болно.
Онгоцны буудал дээр очихдоо олон улсын нислэг бол 2-3 цагийн өмнө харин дотоодын нислэг бол 1-2 цагийн өмнө очихыг зөвлөж байна.
Онгоцны тасалбар хаанаас захиалах вэ?
Онгоцны тасалбар захиалах боломжтой хэд хэдэн платформууд байна. Үүнд:
- онлайн вэбсайт захиалга /нислэгийн компани бүр тус тусдаа албан ёсны вэбсайттай/
- аялал жуулчлалын агентлагууд
- гар утасны аппликейшнүүд
1. Онлайн аялал жуулчлалын агентлагууд
- Expedia – Америкийн томоохон онлайн аялал жуулчлалын агентлаг.
- Booking.com – Зочид буудал, нислэг, машины түрээс зэрэг бүх төрлийн захиалгыг нэг дор хийх боломжтой.
- Kayak – Нислэг, зочид буудал, машины түрээс зэрэг олон төрлийн үйлчилгээг санал болгодог.
- Skyscanner – Нислэгийн үнийг харьцуулж хамгийн хямд нислэгийг олох боломжтой.
- Momondo – Нислэг, зочид буудал, машины түрээсийн үнийг харьцуулдаг.
- Trip.com – Нислэг, зочид буудал, машины түрээс зэрэг олон төрлийн үйлчилгээг санал болгодог.
2. Нислэгийн компаниудын албан ёсны вэбсайтууд
- Аэрофлот – Оросын үндэсний агаарын тээврийн компани.
- MIAT Mongolian Airlines – Монгол улсын үндэсний агаарын тээврийн компани.
- Turkish Airlines – Туркийн үндэсний агаарын тээврийн компани.
- Korean Air – Солонгосын үндэсний агаарын тээврийн компани.
3. Гар утасны аппликейшнүүд
- Hopper – Нислэгийн үнийг урьдчилан таамаглаж, хамгийн хямд цагийг олох боломжийг олгодог.
- Skyscanner – Вэбсайт болон гар утасны аппликейшнээр нислэгийн үнийг харьцуулж захиалах боломжтой.
- Kiwi.com – Олон төрлийн нислэгийн үнийг харьцуулан захиалах боломжийг олгодог.
- Trip.com
4. Аялал жуулчлалын агентлагууд
- Орон нутгийн аялал жуулчлалын агентлагуудтай холбогдон зөвлөгөө авч, нислэгийн тасалбар захиалж болно.
Эдгээр бүх платформууд нь нислэгийн үнийг харьцуулан, хамгийн тохиромжтой нислэгийг олох боломжийг олгодог. Тиймээс нислэгийн захиалга хийхээс өмнө үнийн харьцуулалт хийгээрэй.
Онлайнаар тасалбар захиалах дараалал
1. Онлайнаар тасалбар захиалах
- Вэбсайт эсвэл аппликейшн сонгох: Skyscanner, Expedia, Booking.com Trip.com гэх мэт платформуудын аль нэгийг сонгоно.
- Нислэгийн хайлт хийх: Хаанаас хаа хүрэх, хэзээ нисэхээ оруулж хайлт хийнэ.
- Нислэг сонгох: Үнийн харьцуулалт хийж, өөрт тохирсон нислэгийг сонгоно.
- Мэдээллээ оруулах: Нэр, пасспортын дугаар, холбоо барих мэдээлэл зэрэг шаардлагатай мэдээллээ оруулна./Албан ёсны мэдээллээ оруулах ёстой ба буруу оруулснаас болж асуудал үүсэж болзошгүй тул анхааралтай ханданаарай./
- Төлбөр төлөх: Кредит карт эсвэл бусад төлбөрийн аргаар төлбөрөө хийнэ.
- Баталгаажуулах имэйл хүлээн авах: Захиалга амжилттай болсны дараа баталгаажуулах имэйл ирнэ.
2. Тасалбар баталгаажуулах
- Баталгаажуулах имэйл шалгах: Таны нислэгийн захиалга амжилттай баталгаажсан тухай имэйл ирнэ. Үүнд таны захиалгын дугаар, нислэгийн мэдээлэл багтсан байна. Хэрэв захиалсан тасалбар тань баталгаажсан тухай мэдэгдэл ирэхгүй байвал заавал тухайн захиалсан газраас дахин лавлаж асуух хэрэгтэй.
- Онлайн шалгах: Нислэгийн компани эсвэл аялал жуулчлалын агентлагийн вэбсайт руу орж, захиалгын дугаар эсвэл бүртгэлийн дугаараар шалгаж болдог.
3. Self-Check-In хийх буюу /суудлаа сонгох/
Check-In хийх буюу суудлаа сонгохдоо дараах 3 хувилбараас өөрт эвтэйхнийг ашиглана. Check in идэвхжих хугацаа нь ихэвчлэн нислэг эхлэхээс 24-48 цагийн өмнө байдаг.
- Онлайн check-in эхлэх: Нислэгийн компанийн вэбсайт эсвэл аппликейшн руу орж, check-in хийх боломжтой хугацааг харна. Онлайн тасалбар үүсэх ба утсан дээрээ хадгалж болно. Эсвэл тусад нь өөрөө хэвлээд аваад явж болно.
- Онгоцны буудлын автомат машины check in : Онгоцны буудал руу ормогц автомат төхөөрөмж хүлээж байх ба хувийн мэдээллээ оруулна. Ингэснээр танд онгоцны суудлаа сонгох боломж үүснэ. Мөн онгоцонд суух тасалбар хэвлэгдэж гарах болно.
- Нислэгийн компаний касснаас check in: Онгоцны буудал руу ормогц таны тасалбараа сонгосон нислэгийн компаний кассын ажилтан дээр очиж бичиг баримтаа үзүүлэн тасалбараа хэвлэмэл байдлаар авах боломжтой.
Онгоцоор нисэхдээ ямар цүнх авч орох вэ?
Онгоцоор нисэх үед авч болох цүнхнүүдийн зориулалт болон тэдгээрийг хаана байршуулах тухай мэдээлэл: Carry on Bag болон Personal Item хамтад нь онгоцонд үүрч авч орж болдог. Харин Checked luggage цүнхийг заавал ачаа тээшний хэсэгт өгдөг.
1. Жижиг цүнх (Carry-on bag)
- Зориулалт: Онгоцонд үүрч орох ба дээд тавиурт байршуулах.
- Хэмжээ: Ихэвчлэн 55x40x20 см буюу ойролцоогоор 7-10 кг хүртэл жинтэй байж болно (нисэх компаниас хамаарна).
- Агууламж: Чухал бичиг баримт, хувийн эд зүйлс, зөөврийн компьютер, гар утас, жижиг хөнгөн хоол, эм гэх мэт өдөр тутмын хэрэгцээт зүйлс.
2. Хувийн эд зүйлсийн цүнх (Personal item)
- Зориулалт: Онгоцонд үүрч орох ба суудлын доор байршуулах боломжтой жижиг цүнх эсвэл үүргэвч.
- Хэмжээ: 1-2 кг гар үүргэвч эсвэл зөөврийн компьютерийн цүнх шиг жижиг хэмжээтэй байдаг.
- Агууламж: Нислэгийн явцад хэрэглэх жижиг зүйлс, мөн үнэт зүйлс, утас, түрийвч, ном гэх мэт зүйлс.
3. Ачааны цүнх (Checked bag)
- Зориулалт: Онгоцонд үүрч орох боломжгүй том хэмжээний ачааг ачааны хэсэгт өгдөг.
- Хэмжээ: Нислэгийн компаниас хамаарч өөр байж болно, гэхдээ ихэвчлэн 23-32 кг хүртэл жинтэй байж болно. Жин хэтэрвэл нислэгийн компаниас нэмэлт мөнгө нэхэж болно.
- Агууламж: Хувцас, гутал, гоо сайхны бүтээгдэхүүн, тоног төхөөрөмж, багажаа гэх мэт урт хугацааны хэрэгцээт зүйлс.
- Мэдэгдэл: Шингэн зүйлс (100 мл-с дээш), хурц үзүүртэй эд зүйлс, цахилгаан хэрэгсэл гэх мэт аюултай зүйлсийг ачааны хэсэгт өгөх шаардлагатай.
Том цүнхний жин хэтэрсэн тохиолдолд нэмэлт хэдэн төгрөг төлөх вэ?
Доор дурдсан үнэлгээ нь дундаж жишээ үнэлгээ болно. Хэрвээ та яг нарийн үнийн дүн мэдэхийг хүсвэл тухайн нислэгийн компаниас залгаж тодруулна уу.
Жишээ төлбөрийн тооцоо
- МИАТ Mongolian Airlines: 23 кг-аас хэтэрсэн тохиолдолд 1 кг тутамд 10,000 төгрөг.
- Аэрофлот: 23 кг-аас хэтэрсэн тохиолдолд 1 кг тутамд 5 ам.доллар.
- Turkish Airlines: 30 кг-аас хэтэрсэн тохиолдолд 1 кг тутамд 10 ам.доллар.
- Korean Air: 23 кг-аас хэтэрсэн тохиолдолд 1 кг тутамд 10 ам.доллар, хоёр дахь ачааны цүнхний хувьд 50 ам.доллар.
Нэмэлт зөвлөмж
- Нислэгийн компаниас тодорхой мэдээлэл авах: Өөрийн нисэх нислэгийн компаниас ачааны жин, нэмэлт төлбөрийн тухай мэдээлэл авах нь хамгийн найдвартай арга юм.
- Ачаагаа жигнэх: Ачаагаа нисэхээс өмнө гэртээ жигнэж, хэтэрсэн бол шаардлагагүй зүйлсийг хасах.
- Нэмэлт ачааны төлбөрийн төлөвлөгөө: Нислэгийн компаниудын вэбсайтаар урьдчилан төлбөр төлж, илүү хөнгөлөлт эдлэх боломжтой.
- Том онгоцны буудлууд дээр үнэгүй жинлэгч байдаг. Тухайн жинлэгчийг ашиглаад том цүнхний жинг шалгах боломжтой байдаг.
Иймд, та нислэгийн компанийнхаа вэбсайтаас нарийвчилсан мэдээлэл аваад, ачааны жингээ урьдчилан жигнэж үзээрэй.
Онгоцны шалган нэвтрүүлэх хэсэг /Аюулгүй байдлын шалгалт/
Аюулгүй байдлын шалгалт (security screening) нь нисэх буудалд нислэгт гарахаас өмнө аюулгүй байдлыг хангах зорилгоор хийгддэг чухал алхам юм. Анх удаа нисэх гэж буй танд зориулж аюулгүй байдлын шалгалтыг хэрхэн давах талаар дэлгэрэнгүй тайлбарлаж өгье.
1. Шалгалтын бүс рүү орох
- Баримт бичиг бэлдэх: Суудлын тасалбар (boarding pass) болон паспорт, эсвэл хувийн таних баримтаа бэлэн байлгах.
- Шалгалтын бүс: Шалгалтын бүсэд орох үедээ баримт бичгээ шалгуулах. Зарим тохиолдолд хурууны хээ уншуулах ба шалганы ажилтан таныг бичиг баримт дээр хүн мөн эсэхийг шалгаж болно.
2. Гар тээшний шалгалт
- Гар тээшний хэмжээ: Нисэх компаниас зөвшөөрсөн хэмжээ, жинтэй байгаа эсэхийг урьдчилан шалгана.
- Шингэн зүйлсийн хэмжээ: Шингэн зүйлсийг 100 мл-с хэтрэхгүй хэмжээтэй саванд хийнэ. Эдгээр савнуудыг нэг литрийн хаалттай уутанд хийнэ.
- Металл эд зүйлс: Металл эд зүйлсийг (түлхүүр, гар утас, зоос гэх мэт) халааснаасаа гаргаж, тусгай саванд байрлуулна.
- Notebook, Ipad: Хэрэв гар үүргэвчиндээ гар утас, нөүтбүүк, айпад зэрэг электрон төхөөрөмж хийсэн бол заавал цүнхнээсээ гаргаж тусад нь харуулдаг.
3. Аюулгүй байдлын шалгалтын төхөөрөмжүүд
Жижиг гар цүнхнүүдээ шалгалтаар оруулсны дараа биедээ ямар ч эд зүйлсгүйгээр /body scanner/ бүтэн биеийн шалтгалтанд ордог.
- Цацрагаар шалгах: Гар тээш болон хувийн эд зүйлсээ цацрагаар шалгах төхөөрөмжид байрлуулна.
- Металл илрүүлэгч: Металл илрүүлэгчээр дамжин гарах бөгөөд энэ үед металл эд зүйлсээ тусгай саванд хийсэн байх ёстой.
- Биеийн шалгалт: Зарим тохиолдолд биеийн шалгалт (body scan) хийх шаардлагатай байж болно.
4. Шалгалтын дараа
- Эд зүйлсээ буцаан авах: Цацрагаар шалгуулсан эд зүйлсээ шалгалтын туузан дээрээс авна.
- Шингэн зүйлс: Шингэн зүйлсээ нэг литрийн хаалттай уутнаас гаргах шаардлагагүй, харин бусад эд зүйлсээ буцааж үүргэвчиндээ хийж болно.
Анхаарах зүйлс
- Зөвлөмжүүд: Металл эд зүйлсийг шалгалтад орохоос өмнө гаргаж тавих нь шалгалтын явцыг хурдан болгодог.
- Эм болон тусгай хэрэгцээт зүйлс: Хэрэв эм эсвэл тусгай хэрэгцээт зүйлс байгаа бол тэдгээрийг гаднаасаа нэвт харагддаг уутанд хийж тусгайлан шалгуулна.
- Ээлтэй харилцах: Аюулгүй байдлын ажилтнуудын зааврыг дагаж мөрдөх, тайван харилцах нь шалгалтын явцыг хөнгөвчилнө.
- Багаж хэрэгсэл, хурц үзүүртэй зүйлс: Хурц үзүүртэй зүйлс, багаж хэрэгсэл зэргийг гар тээшинд авч явахыг хориглодог.
Эдгээр алхмуудыг дагаж мөрдвөл аюулгүй байдлын шалгалтыг амжилттай давах боломжтой. Нислэгийн өмнө нисэх буудлын аюулгүй байдлын дүрэм журамтай танилцаж, бэлдэж ирэх нь зүйтэй. Амжилттай нислэг хүсье!
Шалгалтын бүсээс нэвтэрсний дараа юу хүлээж байгаа вэ?
Шалгалтын бүсээс нэвтэрсний дараа таныг юу хүлээж байгаа талаар тайлбарлая. Энэ үе шатанд нисэх буудлын доторх үйл ажиллагаа болон дараагийн алхмуудын талаар мэдэж байвал нислэгийн туршлага тань илүү тайван, амжилттай болно.
1. Паспортын шалгалт (Хэрэв олон улсын нислэг бол)
- Паспортын шалгалтын хэсэг: Олон улсын нислэгийн хувьд паспортын шалгалтын хэсэгт ирж, паспорт болон визний (хэрэв шаардлагатай бол) шалгалтад орно.
- Паспортын хяналт: Паспортын алба хаагчид таны паспорт, визийг шалгана. Шалгалтын дараа танд пасспортоо буцааж өгнө.
2. Татваргүй барааны дэлгүүрүүд (Duty-Free Shops)
- Дэлгүүрүүд: Татваргүй барааны дэлгүүрүүдэд үнэртэн, гоо сайхны бүтээгдэхүүн, архи, тамхи, шоколад болон бусад бараануудыг худалдаж авах боломжтой.
- Хөнгөлөлт: Татваргүй барааны үнэ нь татваргүй тул ихэвчлэн хямд байдаг. Гэсэн ч олон улсын аюулгүй байдлын дүрэм журамд нийцүүлэн худалдан авалт хийх хэрэгтэй.
3. Хоолны газар болон кафе
- Хоолны газар: Шалгалтын бүсээс нэвтэрсний дараа нисэх буудалд олон төрлийн хоолны газар, кафе байдаг. Хооллож, амрах боломжтой.
- Амралтын бүс: Зарим нисэх буудлууд амрах бүс буюу lounge-тай байдаг. Эдгээрт үнэгүй хоол, ундаа, интернет гэх мэт үйлчилгээ байдаг.
4. Онгоцонд суух хаалга (Boarding Gate Area)
- Онгоцонд суух хаалга: Суудлын тасалбар дээрх орох хаалганы дугаарыг шалгаж, тухайн хаалга руу очно.
- Цаг баримтлах: Нислэгийн гарах цагийг дэлгэцээс хянаж, гарах хаалганы ойролцоо байх.
- Суудлын дуудлага: Орох хаалганы ойролцоо сууж, суудлын дуудлагыг хүлээнэ. Нислэгийн ажилтнууд зорчигчдыг суудлын дугаараар нь дуудна эсвэл оочирлуулна.
5. Онгоцонд суух (Boarding)
- Онгоцонд суух: Ойролцоогоор яг нисэх цагаас 15-20 минутын өмнө онгоцонд суулгаж эхлэнэ. Зөвхөн тасалбараа үзүүлээд ороход л болно.
- Суудлын тасалбар шалгах: Гарах хаалган дээр суудлын тасалбар болон паспортоо шалгуулна.
- Онгоцонд суух: Нислэгийн ажилтнуудын зааврын дагуу онгоцонд орж, суудлын тасалбар дээрх суудлаа олох.
Онгоцон доторх тэмдэглээ ба суудлаа олох
1. Суудлаа олох
- Эгнээ олох: Тасалбар дээрх эгнээний дугаараар онгоцны эгнээг олоод, тухайн эгнээнд очно.
- Суудлын байршил: Эгнээний доторх суудлын байршлыг шалгана. Ихэвчлэн суудлын байршил A, B, C, D, E, F гэх мэтээр тэмдэглэгдсэн байдаг.
- A, F: Баруун, Зүүн талын цонхны суудал
- B, D: Дунд суудлууд
- C, E: Захын суудлууд
2. Гар тээшний байршуулалт
- Дээд тавиур: Гар тээшийг дээд тавиурт хөндлөнгөөр нь байрлуулж, суудалд саад болохгүй байхаар зохицуулна.
- Суудлын доор: Бага хэмжээний гар тээшийг урд талын суудлын доор байрлуулж болно.
3. Аюулгүй байдлын бүсээ бүслэх
- Аюулгүй байдлын бүс: Суудалд суусны дараа аюулгүйн бүсээ бүсэлж, нислэгийн ажилтнуудын зааврын дагуу зөв байршуулна.
Онгоцонд хориглох зүйлс
Онгоцонд авч орохыг хориглодог зүйлсийн жагсаалт нислэгийн аюулгүй байдлыг хангах зорилготой байдаг. Эдгээр хориглолтууд нь олон улсын болон орон нутгийн нислэгүүдэд ижилхэн байж болох ба тусгай дүрэм журамтай байдаг. Доорх зүйлсийг онгоцонд авч орохыг хориглоно:
1. Зэвсэг, зэвсгийн төрлийн зүйлс
- Галт зэвсэг: Буу, гар буу, винтов зэрэг бүх төрлийн галт зэвсэг.
- Сум, галт хэрэгсэл: Сум, галт хэрэгслийн бүх төрлүүд.
- Тэсрэх бодис: Бүх төрлийн тэсрэх бодис, галан төхөөрөмжүүд.
- Дайны эд зүйлс: Байлдааны хэрэгсэл, цэргийн тоноглол.
2. Хурц үзүүртэй эд зүйлс
- Хутга, сэлэм: Хутга, сэлэм, илд, дута, шанту гэх мэт хурц үзүүртэй зэвсгүүд.
- Хутганы хошуу, хайч: Хутганы хошуу, хайч, сахлын хутга.
- Зөвшөөрөгдсөн урт: Гар тээшинд авч явах хайчны ир 6 см-ээс бага байх ёстой.
3. Химийн болон хортой бодисууд
- Аюултай химийн бодисууд: Химийн бодисууд, хортой хий, шингэн бодис.
- Халуунд тэсрэмтгий бодис: Шатамхай шингэн, шатамхай хатуу бодис.
- Хортой бодисууд: Хорт бодисууд, хүхэрт устөрөгч, нунтагууд.
4. Шингэн бодисууд
- Шингэний хязгаарлалт: Гар тээшинд авч явах шингэний хэмжээ 100 мл-ээс хэтрэхгүй байх ёстой бөгөөд нийт хэмжээ 1 литрээс ихгүй байх.
- Шингэний савлагаа: Шингэн зүйлсийг нэг литрийн хэмжээтэй хаалттай уутанд хийх.
- Онцгой тохиолдол: Эмийн бодис, хүүхдийн хүнс гэх мэт онцгой шингэн зүйлсийг зохих зааврын дагуу авч болно.
5. Электрон хэрэгсэл
- Том хэмжээтэй батерей: Том хэмжээтэй лити-ион батерей /160 Вт дээш/, зай хураагуур. /хэрвээ жижиг гар утасны powerbank авч орох бол жижиг цүнхэндээ хийгээд онгоцонд үүрээд ороорой.
- Цахилгаан хэрэгсэл: Овор хэмжээ ихтэй цахилгаан хэрэгсэл, тоног төхөөрөмж.
6. Бусад аюултай эд зүйлс
- Тамхи, хийн тамхи: Шатдаг болон хийн тамхи, шатаагч.
- Галын хэрэгсэл: Галын хэрэгсэл, шүдэнз, шатаагч.
- Амьтад: Тусгай зөвшөөрөлгүй амьтад, тэжээвэр амьтад.
Анхаарах зүйлс
- Нислэгийн компанийн дүрэм: Нислэгийн компанийн дүрэм журамтай танилцаж, шаардлагатай мэдээллийг авах.
- Онцгой зөвшөөрөл: Зарим эд зүйлсийг тусгай зөвшөөрөлтэйгээр авч явах боломжтой байдаг тул энэ талаар мэдээлэл авах.
- Асууж лавлах: Шаардлагатай бол нислэгийн ажилтнуудаас асууж лавлах.
Онгоцоор нисэхдээ юунд анхаарах вэ?
“Онгоцоор нисэхдээ юунд анхаарах вэ?” 15 зөвлөмжийг танд хүргэе.
1. Нислэг хийхэд хамгийн тохиромжтой цаг өглөө
2. Онгоцонд хамгийн сүүлд орох
Та онгоцонд хэт яаран суух гэж дайрах хэрэггүй. Үүний оронд хамгийн сүүлд, аажуу тайван ороорой. Ингэснээр таныг ороход зорчигчид суудалдаа суучихсан байх тул, та шахалдаж, суудлаа хайх, зовох шаардлагагүй болно. Мөн яг таныг суумагц онгоц хаалгаа барих тул та аль нэг хүнгүй суудал дээр тухлан суух боломжтой.
Ялангуяа та онгоцны урд суудалд суух бол түрүүлж орох гэж яарах хэрэггүй. Зарим нислэгийн компани хамгийн арийн суудлын хүмүүсээс эхлэн онгоцонд суулгах тохиолдол цөөнгүй байдаг. Учир нь эмх цэгцтэй байдлаар суудалд нь суулгахын тулд ийм арга ашигладаг.
3. Онгоцоор зорчихын өмнө бүү хоол идээрэй
Учир нь онгоц хөөрөх үед агаарын даралт болон бусад хүчин зүйлээс болж танд таагүй мэдрэмж төрүүлж мэдэх тул та аль болох татгалзаарай. Ялангуяа анх нислэг хийх гэж байгаа үед хүний бие агаарын даралтад дасаагүй тул толгой эргэх, чих шуугих, дотор муухайрах тохиолдол байдаг.
Үүнд зориулан онгоцны суудлын халаасны хэсэгт жижиг уут бэлдсэн байдаг. Энэхүү уутыг ашиглаж бөөлжих эсвэл амьсгалах боломжтой.
4. Онгоцонд архи, согтууруулах ундаа бүү уу!
Нислэг хийх үед авиа компаниуд үйлчлүүлэгчийнхээ тав тухыг бодож амтат хоол, дарс вискигээр таныг дайлах боловч архи согтууруулах ундааг хэтрүүлэн хэрэглэхгүй байхын танд зөвлөе. Та бүхэл нислэгийн турш суудал дээрээ хүлүүлж явмааргүй л байгаа байлгүй.
5. Гар ачаа тээшээ амараар шийд
Гар цүнх ачаа тээшээ ачааны бүхээгт найдвартай сайн хийх ба хэрэв багтахгүй эсвэл таны тээшний хэсэг хэдийн дүүрсэн бол онгоцны үйлчлэгчээс тусламж хүсэж болно. Энэ үед үйлчлэгч танд сул талбай гаргаж өгөх болно.
6. Цонхны дэргэдэх суудалд хүйтэн
Онгоц нисч байх үед гаднах агаарын хэм -60°С хүйтэн байдаг бөгөөд энэхүү хүйтэн агаар цонхны дэргэхэд суудлуудад илүү мэдрэгддэг.
Ялангуяа зуны улиралд хүмүүс нимгэн хувцасласнаас ихээхэн даардаг байна. Тиймээс та цонхны дэргэд суух дуртай бол бага зэрэг дулаан хувцаслахыг зөвлөж байна. Аль эсвэл онгоцны үйлчлэгчээс нөмрөх унтлагын хучлага захиалж авахыг сануулъя.
7. Кофе болон цайнаас зайлхий
Нислэгийн үед их хэмжээний шингэн зүйл их уувал агаарын даралтын улмаас хүний биед таагүй мэдрэмж төрүүлж дотор муухай оргих магадлалтай. Халуун уух зүйлс бэлтгэхэд онгоцонд хэрэглэдэг ус нь стафилокк зэрэг хортой бактерийг агуулж байдаг. Тиймээс цай болон кофеноос аль болох татгалзаж үүний оронд савлагаатай ус эсвэл жүүс асуусан нь илүү дээр.
8. Эвхэгддэг ширээ болон суудлын арын халаас онгоцон дахь бохир зүйлсүүдийн тоонд орно
Нислэгийн явцад хуримтлагдсан зарим хог суудлын арын халаасанд үлдэж хоцордгийг та анзаардаг байх. Тэдгээрийг цэвэрлэдэг ч төдийлөн хангалттай биш. Мөн эвхэгддэг ширээ байнга бохирдож байдаг бөгөөд хүмүүс хүүхдийнхээ живхийг солихдоо тогтмол ашигладаг талаар нислэгийн багийн гишүүд хэлж байна.
Иймээс та ширээгээ нойтон салфетикаар арчихаас урьтаж өөрийн хувийн эд зүйлс болоод хоол ундаа хэзээ ч битгий тавиарай.
9. Унтлагын дэрийг хэт их хийлэх хэрэггүй
Унтлагын дэрийг хийлэхдээ физикийн хуулийг мартаж болохгүй. Хэрвээ та эцэст нь хүртэл хэт их хийлвэл бүхээг дэх даралт өөрчлөгдөхөд зад үсрэх аюултай.Тиймээс бага зэрэг сул үлээх хэрэгтэй.
10. Онгоцны аюулгүйн зааварчилгаатай сайн танилц
Нислэгийн өмнө та бүхэнд онгоцны багийнхан аюулгүйн зааварчилгааг танилцуулж үйлдлээр хийж үзүүлэх ба онцгой тохиолдол гарахад хүчил төрөгчийн баг, аврах гарц, аюулгүйн хантааз хэрхэн ашиглах талаар зааварчилгааг сайтар ойлгох хэрэгтэй.
11. Онгоцны урд суувал хурдан бууна.
Онгоцны урд хэсэгт суувал хамгийн түрүүнд гарах боломжтой. Энэ нь та урт удаан хугацааны турш оочерлож зогсох хэрэггүй болно гэсэн үг юм.
12. Цаг агаарт тааруулан хувцасла
Тухайн очих газар болон дамжин өнгөрөх хотынхоо цаг агаарын байдлыг хараад түүнд тохирсон хувцаслалт хийгээрэй.
Нимгэн гараад явсан дамжин өнгөрөх газар чинь хүйтэн байж таарвал хэцүүдэнэ шүү.
13. Хол замд нүдний хаалт, чхний бөглөөс
Нүдний хаалт, сайн дэр, чихний бөглөө бол таны заавал авч явах зүйлс гэдгийг санаарай.
14. Захын суудал сонгох шалтгаан
Илүү тав тухтай байх нөхцөлүүдээ бүрдүүлэх хэрэгтэй. Хөл хавагнан цус овоорох тул зузаан резинтэй, хавагнуулдаггүй оймс өмсвөл зүгээр. Мөн таавчигаа битгий мартаарай. 5-аас олон цаг нисэхээр бол захын суудлыг сонгох нь зүйтэй. Та хүссэн үедээ босож, хөлийнхөө чилээг гаргаж чадна.
15. Онгоцонд маск зүүвэл зүгээр
Онгоцны кондишн агаарыг хуурайшуулдагаас гадна нэг битүү орчинд маш олон хүн амьсгалж байгаа тул энэ тал дээр анхаарахад буруудахгүй. Мөн өндөрт хүчил төрөгч бага байдаг болохоор хүн амьсгалаараа аажмаар шингэнээ алддаг байна. Иймээс урт цагийн нислэгтэй бол ус сайн ууж байгаарай.
